هذا النص طويل فيه بعض الأمور الشخصية و القباحة و مافيهش واجب تحفظ، الحساس يواصل طريقه خاطيه.( التلخيص في الاسفل)
هذا الستاتو طويل فيه بعض الأمور الشخصية و القباحة و مافيهش واجب تحفظ، الحساس يواصل طريقه خاطيه.( التلخيص في الاسفل)
بعض المواطنين، يرون الدنيا أكحل و أبيض، بعقلية جورج بوش : إن لم تكن معنا فأنت ضدنا!
اذا ما توافقش قيس سعيد فأنت مع الغنوشي!
لاباس ماهو؟ هيا سيدي طز فيهم الإثنين!
العالم أرحب من هؤلاء! ما أصغر عالمكم و ما أضيقه! تنجم راهو تكون ما على بالك بحد، تتبع الحق أين تراه، منغير حسابات في مصلحة شكون.
الفرق بيني و بينهم، نخرج من المعطيات و نوصل للنتائج و عندي من الشجاعة لتحمل مسؤولية النتائج مهمن كان المستفيد منها.
و هوما : يخرج من النتيجة الي تساعده و يحاول يطوع المعطيات بالسيف.
باهي، قبل ما نبدأ الجدل الدستوري، خلي نحل قوس شخصي، فيه شوية قباحة ميسالش، فالأمر يستحق:
شوف معلم، قبل ما نجي نائب شعب، كنت نخدم خبير شبكات في وحدة من أكبر البنوك الإستثمارية في فرانسا، الفريق الي شاده فيه 22 مهندس من 9 جنسيات.
عندي cissp و مسرتف cisco و microsoft و stonesoft و checkpoint و fortinet و ماخذ toeic ب 940.
نفكتر نهاري ب1000 أورو، هذا كان ما ثماش أسترانت.
20 نهار خدمة في الشهر، هاذم 20 ألف أورو.
نخلص مصاريفي و ضرائبي و التأمين الصحي، يصحلي 10000 أورو نات في الشهر، يوصلو ساعات 15ألف كيف يبدأ شهر باهي فيه برشة أسترانت.
عندي إقامة دائمة 10 سنين (ما عنديش جنسية، عمري ما طلبتها).
يعني، ما ثماش علاش "نخاف" على الكرسي، الي في جرته، ضيعت كرياري و فلوسي و صحتي (زوز عمليات عملتهم في 3 سنين و الثالثة على قريب غير كوفيد تو و حسب الطبة الستراس عنصر رئيسي) و عايلتي، و نسمح لوبش باش يسمعني الكلام و يحكي في عرضي.
بالعكس، مرتين نكتب الإستقالة و نقول يزي! يحرز ثمة برشة شباب متحمسين نار تشعل، يخدمو في مشاكلك، عزت بيا نجبد بيهم.
التلاثة ملاين و ميتين الي حاسبهم حاجة كبيرة باش نكذب و نتلون على خاطرهم، ألف أورو كنت كاري بأكثر منهم! و زيد ما تنجمش تحل فمك فيهم معايا، مهما بلغت درجة حقدك ما تنجمش تنكر إني محللهم.
نزيدك، في حكومة الجمني و الفخفاخ و المشيشي، راجع تصريحاتي، بعد ما ريت الأمور في المجلس، دعيت النواب لعدم التصويت حتى يتم حل المجلس و الدعوة لإنتخابات مبكرة.
إرتاح، موش الناس الكل كيفك، تجري على كروشها و تاخذ مواقفها لإعتبارات ذاتية شخصية! إخترت إني نعمل السياسة و نضحي على خاطرها خاطر نعتقد إنه عندي باش نفيد البلاد.
نعرف، الي كان يلقى ربع حرقة و 400 أورو صوصيال يبيع البلاد و ما فيها، ما ينجمش يفهم! موش ليه الحديث في الحالات الكل.
النظافة؟ عملت عركات مع أقوى عباد في تونس! رشيد عمار وقت هو رشيد عمار، كمال اللطيف، الشاهد و الباجي و الغنوشي و الفخفاخ، مروان مبروك و نصر علي شقرون و وديع الجريء: كان جات عندي أقل وسخة راهم فتقوني من بعضي، بربشوا بربشوا بربشوا، تجسسوا تبعوا ما لقاو شي و قعدوا كان يخرجو في الإشاعات بالكذب!
هاك إنت طيحت الفخفاخ.. هاو الرئيس كيف كيف...
الأمر لا علاقة :
- - موش أنا طيحت الفخفاخ
- - كي شديت شبهة على الفخفاخ. هزيتها للمحكمة
- - كي الفخفاخ بشبهته و هو رئيس حكومة، ما منعتوش من دخول المجلس لأنه فيه شبهة، مهمتي نعدي الشبهة للمحكمة و إنتهت من يومها.
ياااا إتدافع على وزراء إمسخين؟
لا حبيبي، التناقضات هذيكا عندها إماليها، جماعة النهضة و باراشوكاتهم الي تسحب الثقة لشبهة و تعطي الثقة بنفس الشبهة، عند جماعة التيار and co الي كي في الحكم وضعية تضارب المصالح ماهيش تضارب مصالح و وزيرهم فاسد يولي القانون الي خايب و ينزهوا عن الفساد و في المعارضة العكس تماما!
لا صوتت لحتى وزير فيهم!
و ما ندافع على حتى واحد فيهم! تي فيهم واحد موش شالقين بيه، نخدمله في دوسي، كان صح ما بين يديا من مستندات، بش يشبع حبس.
ندافع على سوابق دستورية خطيرة، و على الفصل بين السلط، على راس المال و العقد الي بيناتنا! أوضح تو؟
نسكر القوس!
نجيو للجنة البندقية.
راهو عندنا وزارة صحة، هل حين نسترشد بتوصيات المنظمة العالمية للصحة، مسينا السيادة الوطنية؟ لا!
كيف كيف في حكاية مقترح لجنة البندقية! هو مجرد إقتراح، يسوى إش يسوى، الي عنده ما خير، كلي آذان صاغية!
نجيو، للمغالطات، بالجملة!
الرئيس كان جاء عنده مشكلة مع الناس الي عندها شبهات، راهو عمره ما إستقبل الفخفاخ و لا صالح بن يوسف، الي عندهم وقتها قضايا جزائية مثارة ضدهم و يستقبل فيهم، حكومة الكمامات و النفايات.
الكله بلوط!
الرئيس و الي يعمر فيه "يرجع في فازة" : طيحتولنا حكومة بشبهات فساد، نطيحولكم حكومة بشبهات فساد!
و لا الي طيح الحكومة الأولى (نهضة، طول أعمارهم متحالفين مع الفساد) و لا الي يحب يطيح الحكومة هذه (تيار كيف كانو يحكمو ينزهو على الفساد و يغطيو عليه و يبرروه) عندهم مشكلة مع الفساد!
مجرد ترجيع فازات صبياني و تفوريخ لا أكثر!
لكن، اذا كان طريق تطييح الحكومة الأولى قانوني
المرة هذه اللعب بالشقف! براس المال! بالدستور!
نفسرلكم سيدي، و ديما بالدستور.
نبداو، شكون صاحب السلطة في البلاد و كيفاش يمارسها!؟
الفصل 3 : الشعب صاحب السلطة يمارسها عبر شكون؟؟ عبر ممثليه المنتخبين.
باهي، الرئيس يأول الدستور؟ لا.
نبداو :
- الفصل 72 : الرئيس يسهر على إحترام الدستور إحترامه، موش تفسيره و لا تأويله و الفرق قانونا كبير!
- الفصل 76 : القسم متع الرئيس يقمسم على ماذا؟ على أن يحترم دستورها و تشريعاتها تشرييعاتها زادة موش كان الدستور، و يحترم موش يفسر
نزيدو،
- الفصول 77 و 78، الي تضبط كل مهام رئيس الجمهورية و صلاحياته
حصرا، هل فيها تأويل الدستور؟ لا! جملة! ولا كلمة! خاطيه
منين جبتوها يأول الدستور؟ لا سيدي الرئيس مطالب بإحترام الدستور و القوانين الكل، لا أكثر!
- نجيو، الفصل 95
الحكومة مسؤولة أمام مجلس نواب الشعب
مسؤولة قدام شكون؟ الرئيس؟ لا! مسؤولة فقط قدام مجلس نواب الشعب! تي حل دستورك ثبت أقرى!
باهي، كيف يصير نزاع بين رئيس الجمهورية و رئيس الحكومة، إش يصير؟
- الفصل 101 : تمشي للمحكمة الدستورية!
تمشي وين؟ للمحكمة الدستورية! موش الرئيس يأول! موش الرئيس يفسر! ما ينجمش يكون خصم و طرف!
باهي كي ما ثماش محكمة دستورية إش نعملو؟
كي توفى الباجي ربي يرحمه، و المحكمة الدستورية موش موجودة
شكون عاين الشغور؟ الهيئة الوقتية لمراقبة دستورية مشاريع القوانين.
هل معاينة الشغور من مهامها بالنص؟ لا!
فجرى العرف، الي هو من مصادر التشريع في العالم أجمع في غياب النص، أن تقوم الهيئة بمهام المحكمة الدستورية، حتى و إن لم يعطيها النص تلك الصلوحية.
نجيو للقسم،
ما عطاش الدستور الحق، لا للبرلمان إنه يرفض إنه رئيس يأدي القسم قدامه و لا لرئيس إنه يرفض إنه وزراء خذات الثقة من البرلمان تأدي القسم قدامه، تتسمى سلطة مقيدة.
تعرفو إش قال أستاذ القانون الدستوري، الأستاذ قيس سعيد في نفس هذا الإشكال لما طرح بين الباجي و الشاهد؟
لا يحق للباجي عدم تعيين موعد لأداء القسم لوزراء الشاهد، هذا يعتبر خرقا جسيما للدستور و تعطيل لدواليب الدولة!
نفس الدستور راهو! أما وقتها كان يعنيه الدستور، تو تعنيه السلطة.
هاو سكت عليها الدستور الفازة.. إش نعملو؟
معلم عندك فصل في الدستور يقلك تاقف في الضوء الأحمر؟ لا!
بحسب المنطق متاعك إذا، بما إنه سكت عنها الدستور، ما يلزمش ناقفو في الضوء الأحمر؟ هكة!
الحجة الي موش في الدستور، موش يأولها الرئيس! بل تفسرها القوانين و التراتيب و الأعراف!
و عندنا عرف سابق في الموضوع و عندنا نص، النظام الداخلي لمجلس النواب، الي نذكر كيفه كيف أي قانون، يصوتوا عليه نواب و ينشر في الرائد الرسمي للجمهورية التونسية.
ريت قداش من مرة عاودتلك دستور! خاطر هذاكا راس المال! اذا بدينا نشلكو فيه، وفى العقد بيناتنا و باع و روح!
نسيتو رواحكم كي فرحانين بال"إنتقال السلس" و العرب باهتين فيكم؟ خاطر إحترمتوا الدستور! فحمانا من بعضنا و حمى بلادنا!
قيس سعيد ربح ب 3 ملاين...
اي آلور! شرعيته مرتبطة بإحترامه للدستور!
هذا موش كلامي! هذا كلام الدستور الي أقسم على إحترامه الجميع و هو أولهم!
باهي
المنظومة خامجة؟ فاسدة؟ سراق؟ بهايم! موافق! و الله العظيم موافق! و نزيدك، ما شقتو كان 1% من الخمج، و كان تشوفو القرف الي حاسه من المنظومة يمكن أكثر ألف مرة منكم.
أما لا حبيبي، خلي نقولهالك للمرة الألف و تغشش مني و إلا إتفلق : تلك بضاعتك ردت إليك! لا هبطوا لا من المريخ لا من زحل انت انتخبتهم و بش تعاود تنتخبهم بعد ما عاودت إنتخبتهم!
نزيد نبشرك؟ شفت إستطلاعات الراي؟ بش تزيد تنتخب أتعس ما في المنظومة، و ما دام ما بعدتش على العاطفية و المضاددة، غدك سيكون أتعس من ماضيك!
و لعلمك راهو الدستور حاميك منهم شوية، تنحى الدستور و تشلك؟ يغورو عليك!
الحل هو حماية دستورك، الأشخاص تمشي و تجي و الدساتير تبقى!
اليوم البلاد راهي في أزمة، الفلوس الي فيها الكل ما تكفيش لمارس
حد ما يسلفك وسط هذه الصبيانبات و la petite politique
و اذا ما سلفنا حد، راهو لا شهاري، لاماء، لا ضوء، لا صبيطارات : تهبطو عليها باش البلد و تخضروها.
لذا، في وضع سليم، الرئيس يقبل الناس للقسم و يعدي الملفات الي عنده للقضاء في إحترام تام لقرينة البراءة (جات في الدستور هذه زادة الي يحرص الرئيس و يسهر على إحترامه) و يتم تفعيل سياسة جزائية للدولة باش المسؤولين تتفصل قضاياهم لف لف، الي خاطيه يسترد شرفه و العامل يتعدى يخلص و اللغط على القسم، تاخذه الهيئة الوقتية تعطي فيه راي، يصنع فقه قضاء.
مع العلم لتوة ما قلنا الرئيس أناهم الوزرة المشبوهين و ماذا يعيب عليهم تحديدا، أعلمنا يا رئيس مواضيع القضايا المرفوعة ضدهم إن وجدت و سطرلي تحت إن وجدت، فقط ليطمئن قلبي!
لكن، أحنا ماناش في وضع سليم، الأمر يهم دولة و أسسها حولوه لعب ذري، حتى إنجمو نتجاوزوا الأزمة بأخف الأضرار على الدستور، إقترحت راي غير مسيس و إستشاري من لجنة البندقية.
الي عنده إقتراح ما خير يتفضل.
نزيد كليمتين قبل ما نلخص :
أسهل ما ثمة في السياسة، إنك تشوف الريح وين ماشي، و شكون بش يربح و الشعب شكون يكره (أقوى محرك للشعوب هو الكره) و تستكوزا تبلاصي روحك و تقول للناس إش تحب تسمع، تو يحبوك و ينتخبوك و يشيخو بيك و تعقبها عليهم.
دور السياسي هو العكس تماما! تكون عنده الشجاعة باش ياقف حتى وحده ضد الراي السائد، يقول الي يلزمه يتقال و حتى كان كرهوه و سبوه، دوره رفع الوعي و إنارة الناس موش مجاراة البهامة و العواطف!
و لتعلم، إني وصلت لمرحلة تملح، إنه لو إجتمعت تونس كاملة تسب فيا، لا يحركلي شعرة، و كان تونس كاملة تضربلي البندير لا يحركلي شعرة!
لم يعد كل هذا مهما! الي يهمني؟ نرقد مرتاح! أرضيت ضميري! الي عملته أو قلته في اللحظة الي عملتو فيها، كنت مقتنع إنه صحيح.
نلخص إذا،
- خاسر فيه الكرسي و مانيش شاد فيه
- لجنة البندقية لا تمس من السيادة الوطنية
- العركة لا فساد لا زمارة، أطرافها الزوز الفساد عندهم ماعون صنعة
- الرئيس لا يأول و لا يفسر الدستور
- الحكومة غير مسؤولة أمام الرئيس
- الدستور هو راس المال و أهم من عركات الذري الي تتراقص
- المنظومة الخامجة انت انتخبتها، مادام ما بدلتش تفكيرك، بش تقعد تخرجلك كل مرة و بصورة أخمج
- رفض الرئيس القسم، خرق فاحش للدستور، قد يحدث سابقة خطيرة تفرغ الإنتخابات من كل معنى.
- حتى حد ما مدلنا رقم أو موضوع قضية فساد ضد أحد الوزراء
- سبني للصباح، لن يغير ذلك شيء.
أخيرا،
لائحة سحب الثقة الماضية من راشد الغنوشي، صوتت مع سحب الثقة و سأصوت مع سحب الثقة في أي لائحة مقبلة ضده، أراه جزء من مشاكل هذا البلد.
أي محاولة لسحب الثقة من رئيس الجمهورية، سأصوت ضد.
