البرلمان هو ملجأ و "جنة قضائية" لمجموعة من السراق و الدواعش لايت، يتخباو فيه من العدالة. في تلك الأثناء، البلاد ماشية لأخطر أزمة إقتصادية و إجتماعية
السؤال هو التالي : واضح أنه الإئتلاف الحاكم حاليا هو تحالف عصابات هدفها الوحيد البقاء في السلطة لضمان الإفلات من المحاسبة، و البرلمان هو ملجأ و "جنة قضائية" لمجموعة من السراق و الدواعش لايت، يتخباو فيه من العدالة. في تلك الأثناء، البلاد ماشية لأخطر أزمة إقتصادية و إجتماعية في تاريخها، و هاذومة مستحيل يمنعوها، بل بالعكس، قاعدين يزيدوا يغرّقوا فيها بكل قواهم.
إيه، ما العمل ؟
الدستور ما فيهوش حلول، و حكاية الفصل 80 خرافة، لأنه ما يحلش المشكل، بل يبقي البرلمان في حالة انعقاد دائم. إنتخابات مبكرة ؟ ما فماش حل دستوري، و هوما مستحيل يوافقوا. المظاهرات والاعتصامات ؟ عندنا حالة وبائية و خمسين وفاة يوميا، ما يجيش. عصيان مدني و جبائي ؟ ما ينجم كان يسرّع وقوع الكارثة، و أكثر ناس باش تتضر منو هي الفئات الهشة و ضعيفة الدخل.
شنوة حلها معاهم ؟ خاطر مستحيل نواصلو هكة لعام 2024.
أنا ما لقيتش حل، و ما ننجمش نقترح على الناس حلول تخليهم هوما يدفعوا الثمن أكثر مني بمراحل. خمموا معايا.
هاذي بلاد بلاش ممالي، و كان باش نخليوها هكة، باش تضيع. لازم نرجعو نحنا مماليها. أما لازم نلقاو كيفاش.