رمضانيات للأستاذ انيس الزين ...كل يوم سورة والا بعض آيات لفهم العبر منها : اليوم الأول في رمضان سنتناول الآية " لإيلاف قريش ".

رمضانيات للأستاذ انيس الزين ...كل يوم سورة والا بعض آيات لفهم العبر منها : اليوم الأول في رمضان سنتناول الآية " لإيلاف قريش ".

 

كيما وعدت في رمضان باش نحلّلوا كل يوم سورة والا بعض آيات وتفهموا منها العبر .

اليوم الأول في رمضان باش نحكي على " لإيلاف قريش " وهي الآية الاولى من سورة قريش والّي تناقش مشكلة حياتية وهي كيفاش بن آدم يوالف النعمة وينسى باش يشكر ربّي الّي وفّرهالو وكان يبات يحلم بيها وما يطولهاش وهذا الّي صار بالضبط مع قريش كيف ربًي ناب عليهم بالخيرات والنعم الي جابتها رحلة الشتاء والصيف ونساوا باش يحمدوا ربي عليها .

بالطبيعة على خاطر الطبيعة قاسية برشة وما فماش مرعى وموارد الرزق ضعيفة وكانت الميزيريا عايمة على قريش الكلً حتى وصل الواحد من كثرة الفقر ياخو عايلتو لبلاصة تتسمى الخباء يخليهم غادي لين يموتوا بالجوع سافلهم على عاليهم بعاد على عينين القبيلة وتتسمّى العادة هذي في الجاهلية الاعتفار . 

وكانت فمَا عايلة كبيرة اسمها بني مخزوم كانوا بكلهم باش يموتوا مالجوع ، وكيف وصل خبرهم لهاشم بن عبد مناف ما عجبوش الجهل والفقر في اهل البيت وسعى باش بدّل العادة وقاللهم أنتوما ذلًيتو العرب بالعادات هذي وانتوما من أهل البيت والناس ليكم تبّع ، وقسم القبيلة لعشاير ، 

وفرض على كلّ غنيً يتقاسم الرزق مع الفقراء من عشيرتو حتى ولّى الفقير والغني قراب برشة لبعضهم  .

وزاد علمهم أصول التجارة ، ونظملهم زوز رحلات في العام وحدة للشام في الصيف  وترتكز على تجارة الخضر والغلال  والاخرى لليمن وتقوم على تجارة المحاصيل الزراعية في الشتاء ، حتى جاء خير الشام وخير اليمن لمكة وولّاوا ناسها في أحسن حال وتتحّات حكاية الاعتفار .

والكفر بالنعمة الي حكات عليه الآية هذي هو وقت تستانس بيها حتى تنسى أنها نعمة .

هذاكا علاش وقت ألفت قريش النعم التي رزقها ربّي ليهم نزّل فيهم الأمر الإلهي باش يعبدوا رب هذا البيت : "فليعبدوا رب هذا البيت الذي أطعمهم من جوع وآمنهم من خوف" .

نعم الله على الناس ما تتعدًش، واذا كان ما عبدوهوش على النعم الّي وهيهالهم على الأقل يعبدوه على دوام النعمة بعد الفقر والجوع ، والعيشة في أمان بعد ما كان ماكنهم الرعب والخوف انهم يموتوا مالجوع .

لا توالف لا تنكر النعمة وتنساها واشكر ربّي باش النعمة توالف بيك وما تهجركش. وافرح بنعمة ربّي عليك واشكرها حتى كان تكررت ألف مرة ، على خاطر دوام النعمة نعمة ، وإلف النعمة من غير شكر المنّان جحود وظلم .

وخلّي كلمة " الحمدلله " على لسانك ديما حاضرة وقولها من قلبك برضا وقناعة وهكا تربح أجر عظيم انو ربّي يدوّم عليك النعم وناس قبل يقولوا ربًي دوم علينا النعمة واحفظها من الزوال . 

الاستاذ انيس الزين